Skip to content
Генералниот секретар на Европската федерација на новинари, Рикардо Гутиерез, остро реагираше на тврдењето на претставничката на Владата на Србија дека земјата претставува европски пример за унапредување на слободата на медиумите, оценувајќи ја таа изјава како невистина без преседан.
Ваквата реакција следува по настапот на српската делегација на Конференцијата за човековата димензија на ОБСЕ во Варшава, каде што официјален Белград се обиде да прикаже напредок во медиумската сфера. Гутиерез нагласи дека токму Србија бележи најдраматично уривање на новинарските стандарди и слободи на целиот континент во изминативе месеци.
Како директен доказ за репресивниот бран врз независното информирање, челникот на најголемата европска новинарска организација го посочи насилното преземање на влијателниот независен портал Нова. Тој образложи дека назначувањето на партиски пропагандист на чело на редакцијата се одвива во атмосфера на директен притисок и заплашување. На новинарите кои одбиваат да се покорат на наметнатата уредувачка линија им е поставен ултиматум да ги напуштат работните места во рок од четириесет и осум часа.
Гутиерез отворено посочи дека ваквите методи јасно го покажуваат автократскиот карактер на власта во Србија, предупредувајќи дека граѓаните на регионот се соочуваат со целосно гушење на објективните извори на вести. Тој упати недвосмислена солидарност до редакцијата што одбива да работи под цензура и се бори за зачувување на професионалниот интегритет.
„Со целото срце стојам со новинарите на порталот Нова. Им оддавам признание за храброста на сите новинари на Нова кои се борат да го сочуваат правото на пристап до слободни, независни и веродостојни информации за сите граѓани на Србија. Целосна поддршка за сите нив од Европската фенерација на новинари“, рече Гутиерез.
