Skip to content
Украинското знаме, кое стоеше на фасадата на зграда во центарот на Приштина од почетокот на војната во таа земја, денес беше отстрането, а градоначалникот Перпарим Рама рече дека кога Косово не се почитува, Приштина одговара на ист начин.
Отстранувањето на украинското знаме од центарот на Приштина следеше еден ден по посетата на претседателот на Украина, Володимир Зеленски, на Србија, каде што рече дека ставот на Киев за непризнавање на Косово останува непроменет.
Перпарим Рама на Фејсбук, заедно со снимката од отстранувањето на знамето, рече дека Косово мора да се почитува.
„Кога Косово не се почитува, главниот град Приштина секогаш одговара на ист начин“, напиша Рама.
Тој изјави дека емпатијата и солидарноста на граѓаните на Приштина секогаш ќе бидат со народите што се соочуваат со војна, насилство и прогон, бидејќи тие „знаат подобро од многу други што значи да се бориш за слобода, достоинство и право да постоиш како држава“.
„Но, ниедна цел и ниедна политика не може да се гради со омаловажување на државноста на Косово и жртвата на неговиот народ“, додаде Рама.
Пред градоначалникот да ја објави својата порака на Фејсбук, на социјалните мрежи се појавија видеа од отстранувањето на украинското знаме.
Патем, од почетокот на војната во Украина, Косово им се придружи на западните земји во осудата на рускиот напад и воведе санкции врз Русија, како знак на солидарност со украинскиот народ, потсетува Газета блиц.
Така, како дел од поддршката за Украина, во центарот на Приштина беше поставено огромно знаме на Украина, кое беше симбол на солидарноста на Косово со украинскиот народ околу четири години.
