Skip to content
Првата беспилотна летечка платформа развиена во Босна и Херцеговина влезе во фаза на интензивни тестирања. Дронот CNT-17FW01 може да остане во воздух до 12 часа и да носи товар до 30 килограми.
Проектот го развива јавната установа Центар за напредни технологии од Сараево, а по завршувањето на почетната развојна и прототипска фаза, инженерите сега ги проверуваат перформансите, ги оптимизираат системите и работат на стандардизација потребна за премин кон индустриски зрел производ.
CNT-17FW01 има распон на крилјата од 5,4 метри и мотор со моќност од 16 киловати. Проценетото максимално времетраење на летот е 12 часа, а носивоста до 30 килограми.
Леталото е развиено првенствено за цивилна употреба, со посебен акцент на операции за пребарување и спасување.
Во актуелната фаза се вршат систематски тестирања и се собираат податоци со кои треба да се потврдат сигурноста и повторливоста на перформансите на леталото пред евентуалното преминување кон готов производ.
Директорот на Центарот за напредни технологии, Енсар Мулаосмановиќ, вели дека сите првично поставени развојни цели се исполнети и дека тимот успеал во еден систем да ги интегрира механиката, погонскиот систем, електрониката, комуникациите, софтверот и енергетскиот систем.
Следниот чекор, според него, е отстранување на недостатоците што ќе бидат откриени при тестирањата и постепен премин од прототип кон технолошки зрел производ.
Центарот наведува дека платформата во иднина може да биде основа и за развој на други автономни системи во соработка со домашни и странски партнери.
CNT е основан во 2018 година од Кантонот Сараево како јавна истражувачко-развојна институција, со фокус на техничките и технолошките науки. Центарот и претходно работел на развој на беспилотни летала, а проектот во 2025 година доби и признание „Made in BiH“ во областа на инженерството.
