Skip to content
Александар Вучиќ вечерва поднесе оставка од функцијата претседател на Србија, по повеќе од девет години на чело на државата. Во последното обраќање како претседател тој соопшти и дека донел одлуки за помилување и аболиција на вкупно 49 лица.
Вучиќ ја потпиша оставката во зградата на Претседателството во Белград и најави дека утре функцијата привремено ќе ѝ ја предаде на претседателката на српското Собрание Ана Брнабиќ. Според Уставот на Србија, кога претседателскиот мандат ќе престане предвреме, претседателот на Народното собрание ја презема функцијата најмногу три месеци.
Нови претседателски избори мора да бидат одржани најдоцна три месеци од престанокот на мандатот. Вучиќ рече дека првиот круг ќе се одржи до крајот на декември, а пред тоа Србија на 25 октомври ќе гласа и на вонредни парламентарни избори.
Како причина за оставката, Вучиќ наведе дека сака во претстојната парламентарна кампања да учествува како обичен граѓанин, а не од позицијата претседател на државата.
Една од последните негови одлуки на функцијата беше помилувањето и аболицијата на 49 лица.
Од нив, според неговото објаснување, 23 се поврзани со политичките и општествените судири во Србија во изминатата година и половина. Меѓу нив се 12 активисти од т.н. „новосадска група“, вклучително и Мила Пајиќ, како и 11 лица кои учествувале во инциденти против граѓани и студенти кои биле дел од блокадите.
Дванаесеттемина новосадски активисти и студенти беа обвинети за наводен обид за уривање на уставниот поредок. Шестмина од нив поминале период во притвор и домашен притвор, додека други шестмина биле надвор од Србија и им се судело во отсуство. N1 Info RS
Вучиќ рече дека одлуката ја донел и покрај различните мислења на дел од надлежните комисии и безбедносните служби, нарекувајќи ги помилувањето и аболицијата „акт на милост“. Неговата оценка за одговорноста на опфатените лица остана непроменета, но рече дека сака со одлуката да се намалат тензиите во општеството.
Со поднесувањето на оставката, на Вучиќ му престанува претседателскиот мандат истиот ден. Уставот на Србија предвидува дека претседателот ја поднесува оставката до претседателот на Народното собрание и дека мандатот престанува со самото нејзино поднесување.
Србија така влегува во период со два изборни процеси за кратко време – парламентарните избори се закажани за 25 октомври, а нов претседател треба да биде избран до крајот на декември.
