Skip to content
Македонските фудбалери вечерва се пред еден од најголемите предизвици во новото издание на Лигата на нации. Противник е квалитетната селекција на Швајцарија, која во Скопје пристигнува по пласманот во четвртфиналето на Светското првенство во 2026 година.
Ова ќе биде прв меѓусебен натпревар на сениорските репрезентации на Македонија и Швајцарија. Натпреварот истовремено го означува историското деби на македонскиот национален тим во Лига Б, откако претходно беше изборен пласман во повисок ранг.
Македонија е дел од групата Б1, во која се наоѓаат и репрезентациите на Словенија и Шкотска. По вечерашната средба, избраниците на селекторот Гоце Седлоски на 29 септември ќе ѝ гостуваат на Словенија во Љубљана.
Селекторот Седлоски изјави дека е задоволен од односот и работата на фудбалерите во текот на подготовките. Според него, сите репрезентативци се здрави и подготвени за настап, со исклучок на Бобан Николов, кој нема да биде во комбинација за вечерашниот натпревар.
„Знаеме каков состав има Швајцарија, но сакам пред сè да размислуваме за нас. Со помош на публиката верувам дека можеме да стигнеме до позитивен резултат“, порача Седлоски.
Капитенот Енис Барди нагласи дека поддршката од трибините може да биде важен фактор, особено затоа што Македонија по подолга пауза повторно игра пред домашната публика.
„Играме во Скопје, ова е нашиот дом и треба да го покажеме нашиот идентитет. Свесни сме дека пред нас е тежок натпревар, но подготвени сме да го дадеме максимумот“, изјави Барди.
Оптимист е и Елиф Елмас, кој очекува тежок дуел против моќен противник, но верува дека Македонија има квалитет да се бори за поволен исход.
Швајцарскиот тим е предводен од селекторот Мурат Јакин и располага со повеќе искусни фудбалери од најсилните европски првенства, иако во Скопје допатува без неколку стандардни репрезентативци.
Натпреварот Македонија – Швајцарија започнува вечерва во 20:45 часот на Националната арена „Тодор Проески“
