Skip to content
Протестите на средношколците во Франција денес се проширија на универзитетите, додека студентите и учениците – барајќи повеќе средства, помал број на ученици во одделенијата и замена на отсутните наставници – продолжија со блокадите низ целата земја.
По неколкудневните протести во кои имаше повредени меѓу учениците и полицијата, Владата објави нова платформа за разгледување на жалбите на средношколците, објави Радио Франција Интернешнл (RFI).
Немирите го нарушија јавниот превоз во неколку градови, а премиерот Себастијан Лекорну свика кризен состанок за денес попладне за тоа како да се ограничат протестите.
Според полицијата, до средината на утрото, околу 340 демонстрации се одржаа пред средните училишта, поради што повеќе од 160 беа затворени.
Триесет универзитетски кампуси беа блокирани во четврток, соопшти Студентскиот сојуз (Union Étudiante), вклучувајќи локации во Париз, Стразбур, Марсеј, Лион, Ремс, Поатје и Нантер.
Движењето започна во средните училишта пред околу една недела, а до среда се прошири во 356 училишта низ целата земја, објави Министерството за внатрешни работи.
Жалбите од учениците се движат од распореди на часови, големина на класови и недостаток на наставници до прегреани училници за време на овогодишните топлотни бранови.
Денес, стотици ученици во Стразбур го блокираа сообраќајот и трамвајската линија пред средното училиште „Куфињал“ и запалија контејнери за ѓубре. Во Сен Дени, северно од Париз, избувнаа судири меѓу младите и полицијата, при што беа употребени пиротехнички проектили и солзавец.
Во Нант, избувна пожар во средното училиште „Нелсон Мандела“ откако пожарот од запалена канта за ѓубре се прошири на зградата, изјавија учениците за францускиот дневен весник „Паризиен“.
Во средното училиште „Виктор Иго“ во Марсеј, директорот, помошникот-директор, генералниот секретар и друг член на персоналот беа нападнати и полеани со бензин, соопштија регионалните власти на Прованса-Алпи-Азурен Брег.
Во Ошел, на север од Франција, директорот на средното стручно училиште „Фернан Дегружие“ претрпе сериозна повреда на увото од пиротехнички проектил и е во болница.
Префектурата на департманот Па-де-Кале објави дека 37 лица се приведени поради насилство во близина на училиштата.
Во среда, 625 лица беа приведени за време на блокадата на средните училишта, изјави министерот за внатрешни работи Лоран Нунес, посочувајќи на „ширењето на движењето“ и осудувајќи ја „ескалацијата на насилството“.
83 полицајци и жандарми беа повредени.
Властите, исто така, објавија за палење канти за ѓубре, користење пиротехнички проектили и поставување барикади.
Од почетокот на блокадите, повредени се 119 ученици и вработени во училиштата, изјави министерот за образование Едуар Зефре.
Премиерот Лекорну побара од министрите да ги откажат или одложат официјалните патувања планирани за остатокот од оваа недела и почетокот на следната недела, за да можат префектурите да ги фокусираат своите ресурси на справување со ситуацијата со протестите.
Од училиштата е побарано да организираат учење од далечина во случаи кога штетите или блокадите го спречуваат безбедниот прием на учениците.
Францускиот претседател Емануел Макрон им изјави на новинарите во среда: „Ја слушам и разбирам загриженоста, а понекогаш и гневот што го чувствуваат нашите млади – без разлика дали станува збор за климата, технолошките промени или геополитичките околности“, и дека тој и владата се обидуваат да одговорат „на најконкретен можен начин“.
Сепак, Макрон истакна дека ниту една од тие дебати или стравови не може да ги оправда немирите и ги критикуваше политичарите од крајната левица, обвинувајќи ги дека „даваат легитимитет на насилството“.
Францускиот полициски надзорник, Генералниот инспекторат на националната полиција (IGPN), започна три истраги за инциденти во кои беа повредени студенти за време на протестите, рече Нуњез.
Истрагите се однесуваат на инциденти во Севран (североисточно од Париз), Сен-Оен-л’Омон (северозападно од главниот град) и Тур (во централна Франција).
Во Тур, во среда, еден млад човек доби повреда на главата и е во болница. Јавниот обвинител рече дека повредите се „конзистентни“ со оние предизвикани од проектил испукан од полициски фрлач LBD – вид несмртоносно оружје.
Нуњез ги бранеше постапките на безбедносните сили, наведувајќи дека тие интервенирале со „висок степен на пропорционалност“.
USL, вториот најголем студентски сојуз во Франција, во среда повика протестот да прерасне во „втор чин“.
Тие ги повикаа синдикатите, здруженијата и политичките организации да се приклучат на демонстрациите во четврток и последователните протести на 6 октомври, барајќи „масовни инвестиции“ во училиштата и универзитетите.
UNEF, третата најголема студентска организација во Франција, исто така ги повика студентите да излезат на улиците низ целата земја.
Тие протестираат против, како што велат, драстичното намалување на бројот на места на универзитетите, како и против замрзнувањето на исплатите за помош за домување, додава RFI.
