Skip to content
Основното јавно обвинителство Битола поднесе обвинение против петмина лекари-интернисти од Клиничката болница „Д-р Трифун Пановски“, поради сомнение за несовесно лекување на 40-годишна пациентка кое завршило со смрт.
Според Обвинителството, случајот се однесува на периодот од 28 мај до 4 јуни 2024 година, кога пациентката повеќепати била прегледувана и лекувана на Одделот за интерни болести.
Таа првично била упатена во болницата со сомнение за тромбофлебитис, но по прегледот ѝ била поставена дијагноза ревматоиден артритис и била пуштена дома со терапија.
Обвинителството тврди дека не била земена целосна анамнеза и не биле направени доволно анализи, поради што навреме не била откриена тромбозата и не била започната соодветна терапија.
Пациентката повторно се јавила во болницата на 1 јуни со силни болки во стомакот и влошена општа состојба, по што била хоспитализирана.
И покрај абнормалните лабораториски и биохемиски наоди, Обвинителството наведува дека во следните четири дена дежурните лекари не презеле дополнителни дијагностички испитувања за да ја утврдат причината за влошувањето.
На 4 јуни пациентката побарала медицинска помош во приватна клиника во Скопје, каде била примена во тешка состојба.
При итен хируршки зафат била утврдена тромбоза на горната и долната мезентерична артерија, со комплетна гангрена на тенкото и дебелото црево. Состојбата веќе била неоперабилна, а пациентката починала следниот ден.
Петмината лекари се обвинети за тешки дела против здравјето на луѓето, во врска со несовесно лекување болни
