Skip to content
Моќно магнетно поле можеби одиграло клучна улога во создавањето на Сончевиот систем пред околу 4,6 милијарди години, покажува ново истражување на научници од Масачусетскиот институт за технологија.
Досега гравитацијата се сметаше за главната сила што го претворила огромниот облак од гас и прашина во младото Сонце и протопланетарниот диск од кој подоцна се формирале планетите. Новите податоци, сепак, покажуваат дека и магнетизмот веројатно имал значително влијание врз целиот процес.
Клучните докази се пронајдени во микроскопски зрнца од метеоритот DOM 08006, откриен на Антарктикот во 2008 година.
Станува збор за калциум-алуминиумски инклузии – едни од најстарите познати материјали од почетоците на Сончевиот систем. Тие се формирале во првите околу 200.000 години од неговото постоење и во себе зачувале траги од тогашното магнетно поле.
Анализите покажале дека полето било исклучително силно – меѓу три и 12 пати посилно од денешното магнетно поле на Земјата.
Научниците сметаат дека тоа магнетно поле можело да помогне материјата од првичниот облак да се движи кон центарот, овозможувајќи формирање на младото Сонце и на дискот од гас и прашина околу него.
Токму преминот од речиси сферичен облак во рамен протопланетарен диск е еден од клучните моменти во создавањето на нашиот планетарен систем.
Новото откритие не ја оспорува улогата на гравитацијата, туку покажува дека формирањето на Сончевиот систем веројатно било резултат на заедничкото дејство на повеќе физички сили.
Метеоритите се особено значајни за ваквите истражувања бидејќи дел од нив содржат материјал кој практично не се променил од најраните фази на Сончевиот систем. На тој начин тие функционираат како своевидна временска капсула од периодот пред формирањето на Земјата и останатите планети.
Откритието може да им помогне на научниците подобро да разберат не само како настанал нашиот систем, туку и како се формираат планетарните системи околу други млади ѕвезди.
