Skip to content
20 полицајци следат тинејџер во Виена кој двапати бил осуден во случаи поврзани со планирање терористички напади, откако 16-годишникот кон крајот на август повторно бил предвреме пуштен од затвор. Австрискиот весник „Кронен цајтунг“ објави дека тој е под постојан надзор поради проценетиот безбедносен ризик.
Случајот првпат стигнал во јавноста во февруари 2025 година, кога момчето имало 14 години. Според обвинението, тој планирал напад врз железничката станица „Вестбанхоф“ во Виена, користејќи огнено оружје или експлозивна направа.
Истрагата покажала дека тинејџерот се радикализирал преку интернет и следел пропагандни содржини поврзани со Исламската држава. Полицијата пронашла скици од железничката станица, цртежи со вооружени напаѓачи и материјали за кои обвинителството се сомневало дека биле наменети за подготовка на експлозивна направа.
Случајот бил откриен по информација што австриските власти ја добиле од германската Федерална криминалистичка полиција. Во јули 2025 година, тинејџерот бил осуден на две години затвор, при што дел од казната бил условен.
Минатата есен бил пуштен на условна слобода, но по четири недели повторно бил приведен откако се обидел да набави борбен нож со сечило долго 12 сантиметри. Бидејќи самиот не успеал да го купи, тоа го направил негов роднина кој го чекал пред продавницата.
При анализата на неговиот мобилен телефон биле пронајдени пребарувања за ножеви, мачети, секири и различни видови експлозивни направи. На второто судење, одржано во март годинава, обвинителството ги претставило и пораките и изјавите што укажувале дека неговата радикализација продолжила.
По втората пресуда тинејџерот бил испратен во затворот во Клагенфурт. Според „Кронен цајтунг“, таму величал извршител на терористички напад, иако затворска психологинка уште во 2025 година предупредила дека станува збор за „исклучително опасен“ млад човек.
И покрај предупредувањата, 16-годишникот кон крајот на август повторно бил предвреме пуштен. Неговото ослободување ја активирало австриската Дирекција за државна безбедност и разузнавање, која официјално соопштила дека се преземени „соодветни мерки“.
Австриските медиуми тврдат дека за надзорот во различни смени дневно се ангажираат околу 20 полицајци, додека специјалната единица „Кобра“ е во постојана готовност. Австриските власти јавно не го потврдиле точниот број ангажирани службеници.
