Skip to content
Бројот на жртви од двата земјотреси што ја погодија Венецуела се искачи на најмалку 235, додека повеќе од 4.300 луѓе се повредени, изјави министерот за здравство Карлос Алварадо. Вториот земјотрес беше најсилниот во таа земја за повеќе од сто години.
Алварадо изјави за државната телевизија дека до четврток во 19 часот, здравствените установи лекувале повеќе од 4.300 повредени лица, од кои повеќето имале полесни повреди, но имало и пациенти со тешки и умерени повреди.
Според него, на многу луѓе им била потребна хируршка интервенција.
Земјотреси со јачина од 7,5 и 7,2 степени според Рихтеровата скала ја погодија Венецуела ноќта помеѓу среда и четврток. Американскиот геолошки завод објави дека станува збор за редок феномен познат како „дублет“, односно двоен земјотрес. По овие два земјотреса, регистрирани се најмалку 138 последователни потреси.
Во земјата е прогласена вонредна состојба, а воздушниот и железничкиот сообраќај се прекинати.
Многумина се водат како исчезнати или сè уште се заробени под урнатините, додека спасувачките екипи бараат преживеани дури и во текот на ноќта. Многу жители останаа без покрив над главата откако нивните домови беа срамнети со земја во пристанишниот град Ла Гваира, главниот град Каракас и околните области.
Катастрофата ја погоди Венецуела во време кога земјата веќе се соочува со длабока политичка и финансиска криза. Спасувачките екипи од различни делови на светот се подготвуваат да пристигнат, додека ветувањата за странска помош се налеваат. Сепак, таканаречениот „златен период“ за пронаоѓање преживеани станува сè пократок.
Се појавија и неколку неофицијални веб-страници каде што семејствата објавуваат фотографии од своите исчезнати најблиски. Еден хуманитарен работник изјави дека жителите исто така бараат роднини на улиците.
Обединетите нации соопштија дека го координираат распоредувањето на екипи за пребарување и спасување во Венецуела, бидејќи повеќе земји понудија помош. Соединетите Американски Држави најавија помош од 150 милиони долари, а американската војска соопшти дека ќе испрати достапни сили на Јужната команда во регионот.
УНИЦЕФ предупреди дека илјадници деца се во опасност и дека на многу семејства им е потребна итна помош.
Земјотресите ставија дополнителен товар врз здравствениот систем на Венецуела, кој е во криза со години.
Привремениот претседател Делси Родригез ја посети државата Ла Гваира во четврток, областа најтешко погодена од земјотресите.
Се помалку време за луѓето под урнатините
Екипите на Црвениот крст се исто така на терен и помагаат во спасувањето.
„Веројатноста да се пронајдат живи се намалува со секој час“, изјави нивни претставник.
Обемот на уништувањето е тешко да се процени, но јасно е дека многумина ги загубија своите домови.
„За среќа, моето семејство, мојата сопруга, внуката и јас бевме надвор од зградата. Кога се вративме видовме дека е целосно уништена. За среќа, соседите успеаја да се спасат. Што да кажам? Колку семејства ќе завршат вака, со уништени згради во Каракас?“, праша човекот кој го загуби својот дом во земјотресот.
Наредена е евакуација од сите оштетени згради. Властите го повикаа населението да покаже солидарност. И ветија реставрација.
„Сакам да го објавам основањето на почетен фонд од 200 милиони долари, со средствата што ги имаме на располагање од Меѓународниот монетарен фонд. Со тие пари, ќе ја обновиме инфраструктурата и болниците и ќе изградиме домови за луѓето што ги загубија своите домови“, објави претседателката на Венецуела, Делси Родригез.
Црвениот крст издвои два милиони франци за Венецуела. САД и Кина и голем број земји од Европа и Латинска Америка понудија помош.
