АНКЕТА: Дали ѝ верувате на водата што ја пиете од чешма?

Водата од јавниот водовод треба да биде основна услуга во која граѓаните не се сомневаат. Сепак, по последните проблеми во повеќе делови од Македонија, прашањето дали водата од чешма е безбедна веќе не е само здравствено, туку и прашање на доверба во институциите.

Во Гостивар на 17 јули беше забранета употребата на водата за пиење поради сомнение дека е загадена и небезбедна. Граѓаните со недели чекаат конечна анализа за причините и одговорноста, која Министерството за здравство ја најави до 20 август.

Само неколку дена подоцна, во водата од градскиот водовод во Валандово беше утврдено зголемено ниво на арсен, по што на жителите им беше препорачано да не ја користат за пиење. Претходно, забрани и ограничувања имаше и кај дел од селските водоводи во Охридско.

Кога луѓето почнуваат да купуваат флаширана вода не затоа што ја претпочитаат, туку затоа што не знаат што тече од нивната чешма, тогаш водоснабдувањето станува и здравствен и институционален проблем.

Кој е вашиот став?