Skip to content
Британците добија препорака да летуваат во Македонија како една од европските дестинации во кои можат да ги избегнат долгите редици предизвикани од новиот систем за влез и излез во Шенген-зоната. „Индипендент“ ја вброи земјава меѓу десетте европски избори за одмор во 2026 година кои не се опфатени со системот ЕЕС.
Британскиот весник оценува дека Македонија е потценета балканска дестинација со драматични планински предели, антички локалитети и богато османлиско наследство.
Посебно место во препораката има Охридското Езеро, опишано како едно од најстарите и најдлабоките езера во Европа. На британските туристи им се препорачуваат стариот дел на Охрид, средновековните цркви, тврдините и традиционалните куќи изградени на стрмните калдрмисани улици.
Како дестинација за краток градски одмор е посочено и Скопје. „Индипендент“ ги издвојува Старата скопска чаршија, Калето и погледите кон Водно и Шар Планина.
Македонија е вклучена на листата бидејќи не е дел од Шенген-зоната и на нејзините граници не се применува европскиот систем ЕЕС. Британските туристи затоа не треба да поминуваат низ новата постапка за земање отпечатоци од прсти и фотографирање што се применува при влез во земјите од Шенген.
ЕЕС беше воведен за електронско регистрирање на влезот и излезот на патниците од земји надвор од Европската Унија. Неговата примена на дел од европските аеродроми и гранични премини предизвика долги редици, доцнења и проблеми за патниците.
„Индипендент“ пишува дека во најлошите случаи туристите чекале и по неколку часа пред пасошката контрола. Поради тоа, весникот им препорачува на Британците да разгледаат дестинации надвор од Шенген, меѓу кои Македонија, Албанија, Босна и Херцеговина, Црна Гора, Србија и Косово.
Британските државјани можат да престојуваат во Македонија до три месеци без виза. За влез им е потребен важечки пасош, а британското Министерство за надворешни работи ги советува патниците пред заминувањето да ги проверат условите за патување и да обезбедат соодветно осигурување.
Препораката доаѓа во период кога туристите сè почесто бараат поевтини и помалку оптоварени алтернативи на популарните летувалишта во Грција, Италија, Хрватска и Шпанија.
За Македонија, вклучувањето во листата на влијателниот британски весник е можност Охрид, Скопје и планинските дестинации да се претстават пред поширока публика како достапна алтернатива за летен одмор на Балканот.
