Skip to content
Ќе поскапи ли парното за 54 проценти ќе одлучува Регулаторната комисија за енергетика, откако трите компании за парно греење на ЕСМ ги доставија пресметките со барања за зголемување на цените од над 30 до речиси 54 проценти, а новата цена треба да биде донесена до крајот на јули и да важи од 1 август.
Телма објави дека најголемо зголемување побарала компанијата што го врши снабдувањето со топлинска енергија. Според објавените пресметки, ЕСМ Снабдување бара зголемување од 53,9 проценти, ЕСМ Дистрибуција 45,5 проценти, а ЕСМ Производство 32,7 проценти.
Од Државните електрани за Телма тврдат дека во пресметките не влегуваат само прогнозите за цената на гасот, туку и реалните трошоци направени во претходната грејна сезона, како и стари трошоци од претходни години кои, според нив, регулаторот ги признал, но не биле вклучени во тогашните одлуки за крајната цена на парното.
Во дописот на ЕСМ до Телма се наведува дека најголемо учество во бараното зголемување имаат трошоците од претходни одлуки на РКЕ, со цел да се надомести загубата на друштвата од претходни грејни сезони, додека само околу 14 проценти од бараното зголемување се поврзуваат со прогнозите за гас и неопходните трошоци за вршење на дејноста.
Последниот збор ќе го има Регулаторната комисија за енергетика, која треба да оцени кои трошоци ќе ги прифати, а кои нема да влезат во крајната цена. На официјалната страница на РКЕ е објавено известување за поднесени барања за одобрување максимален регулиран приход и цена за 2026 година за снабдување со топлинска енергија на АД ЕСМ – Подружница.
Одлуката е чувствителна затоа што директно ќе влијае врз сметките на домаќинствата приклучени на централното греење во Скопје. Ако барањата бидат прифатени во целост, граѓаните би се соочиле со значително повисоки трошоци за парно уште од почетокот на август.
Последното поскапување на парното изнесуваше 5,9 проценти, со образложение дека се потребни инвестиции во мрежата по проблемите во претходната грејна сезона. Сега, барањата се далеку повисоки и отвораат нов притисок врз буџетите на домаќинствата, особено во период кога инфлацијата и трошоците за живот остануваат чувствителна тема.
Дополнителен контекст е и фактот што трите фирми за парно на ЕСМ се најдоа на листата на должници на Министерството за финансии. Според Телма, најмногу доспеани, а неподмирени обврски има ЕСМ Дистрибуција, што ја отвора дилемата дали дел од финансиските проблеми на компаниите ќе се префрлат во конечната цена што ќе ја плаќаат потрошувачите.
РКЕ до крајот на јули треба да ја пресече сметката меѓу барањата на компаниите и заштитата на потрошувачите. Дотогаш, бројките од 32,7, 45,5 и 53,9 проценти остануваат барања, а не конечна одлука за цената на парното.
