Skip to content
Олимписки пикник денеска се одржа на просторот пред СЦ „Јане Сандански“ во Скопје, во организација на Македонскиот олимписки комитет, како традиционален настан што ги обедини спортистите, олимпијците, соработниците и пријателите на спортот во ден посветен на дружење, забава и негување на олимписките вредности.
Настанот помина во пријатна и опуштена атмосфера, со акцент на спортската заедница и врските што се градат надвор од натпреварувачките терени. Официјалниот дел го отвори претседателот на МОК, Даниел Димевски, кој го истакна значењето на Олимпискиот пикник како простор за поврзување на луѓето што го создаваат и поддржуваат македонскиот спорт.
На настанот присуствуваа и амбасадорката на Народна Република Кина, Џианг Сјаојен, претставници на Грчката амбасада, спортисти, олимпијци и соработници на МОК. Посебно внимание беше посветено на тимот што работеше на Европскиот младински олимписки фестивал, кој доби јавно признание и подароци како благодарност за посветениот ангажман.
Олимпискиот пикник имаше и културно-спортска програма со кинески вештини. По поздравното обраќање на амбасадорката Џианг Сјаојен, вработени во Амбасадата на НР Кина изведоа демонстрација на традиционалната вештина Ba Duan Jin. Потоа следеше настап со Wing Chun Kung Fu, односно Wushu, предводен од Сифу Мирослав Тодоровски.
Интерактивниот дел внесе посебна енергија во настанот. Присутните не беа само публика, туку имаа можност и самите да се вклучат, да ги пробаат вежбите и да се запознаат со дел од древните кинески вештини. Тоа создаде раздвижена атмосфера, со многу насмевки и учество од различни генерации.
По официјалната програма, дружењето продолжи со музика, храна, освежителни пијалаци и спортски активности. Љубителите на активниот одмор ги искористија термините за падел, тенис и пинг-понг, додека волонтерите се грижеа за организацијата и текот на настанот.
