Во Турција приведени 17 лица во истрага за нелегално обложување и местење натпревари

Акцијата била спроведена истовремено во Истанбул и уште девет турски покраини, а според истражните органи, приведените се осомничени дека учествувале во нелегално обложување и местење натпревари. Меѓу нив има функционери на повеќе фудбалски клубови, вклучувајќи и претставници на познати турски екипи. 

Обвинителството соопшти дека истрагата опфаќа анализи на податоци од легални обложувалници во периодот од 2020 до 2026 година. Истражителите ги споредувале податоците за обложување со информациите за службените лица во клубовите, при што откриле сомнителни активности и облози поврзани со натпревари во кои тие имале службена улога. 

Според турските медиуми, во рамки на истрагата се трага и по уште две лица, а обвинителите не ја исклучуваат можноста истрагата дополнително да се прошири. Министерството за правда на Турција порача дека ќе продолжи со решителна борба против сите активности што го нарушуваат интегритетот на спортските натпреварувања. 

Ова е само една од серијата акции што турските власти ги спроведуваат во последните месеци во рамки на големата истрага за нелегално обложување и местење натпревари. Претходно беа приведени десетици осомничени, меѓу кои фудбалери, судии, тренери и клупски функционери, а истрагата ги опфаќа сите нивоа на турскиот фудбал. 

Случајот предизвика силни реакции во турската спортска јавност, особено затоа што доаѓа во период кога турскиот фудбал се обидува да го подобри својот меѓународен углед. Фудбалската федерација и надлежните институции најавуваат целосна соработка со обвинителството за расчистување на сите сомнежи поврзани со местење натпревари и нелегално обложување.