Skip to content
Уште четири лица од предметот поврзан со Фудбалската федерација на Македонија, кои претходно биле недостапни за органите на прогонот, се обезбедени, соопшти Јавното обвинителство за гонење организиран криминал и корупција.
Според информациите што ги објави ТВ 24, двајца од нив денеска биле изведени пред судија на претходна постапка. За еден осомничен е определена мерка притвор, а за вториот мерки за обезбедување присуство. Останатите две лица треба да бидат изведени пред судија на претходна постапка утре.
Ова е нов развој во предметот ФФМ, по акцијата во која, според Обвинителството, се опфатени 18 физички и 8 правни лица. Истрагата се однесува на сомнежи за кривични дела „Проневера во службата“ и „Перење пари и други приноси од казниво дело“.
Пред два дена беше определен притвор од 30 дена за поранешниот претседател на ФФМ, Илчо Ѓорѓиоски, и за уште две лица. За петмина беше определен куќен притвор, а за четворица мерки на претпазливост.
Според официјалното соопштение на Јавното обвинителство, со истрагата се опфатени двајца поранешни претседатели на ФФМ, раководителка на Одделението за финансии и сметководство, управители, сопственици и овластени лица во правни субјекти, како и раководител на Одделот за судии и судење при ФФМ.
Обвинителството наведува дека во различни периоди биле одобрени и потпишани вкупно 728 налози за исплата без целосна и валидна финансиска документација и без претходна проверка на основаноста и намената на исплатите.
Според наводите во истрагата, на ФФМ ѝ била причинета штета од над 180 милиони денари. Осомничените правни лица, според Обвинителството, се стекнале со противправна имотна корист, а потоа средствата биле пуштани во финансиски промет со цел да се прикрие нивното незаконско потекло.
Сите лица во оваа фаза се осомничени и важи презумпцијата на невиност до правосилна судска одлука.
