Skip to content
Овие сосови можат да станат ризик за здравјето и пред истекот на рокот на траење ако се отворени, долго стојат во фрижидер или се чувани неправилно.
Најголем ризик носат мајонезот и кремастите преливи, особено оние што содржат јајца, сирење или млечни состојки. Иако на амбалажата може да стои подолг рок, по отворањето тие не треба со месеци да остануваат заборавени на полиците во фрижидерот.
Отворен мајонез е безбеден за употреба околу два месеца ако се чува во фрижидер. Но, ако теглата или тубата остане на собна температура неколку часа, подобро е да се фрли, бидејќи ризикот од бактерии расте многу побрзо.
Истото важи и за сосови што содржат мајонез, како тартар, ајоли и дел од кремастите сосови за салати. Променет мирис, необичен вкус, раздвојување на состојките, горчина или појава на мувла се знаци дека производот повеќе не треба да се користи.
Кечапот, барбекју-сосот и коктел-сосовите траат подолго затоа што често содржат шеќер, киселина и други состојки што го забавуваат расипувањето. Но, тоа не значи дека можат бескрајно да стојат по отворањето. Откако ќе се отворат, најчесто треба да се потрошат во рок од околу шест месеци, а промената на боја, чуден мирис или мувла се јасен знак за фрлање.
Сенфот, Worcestershire сосот и соја сосот имаат подолг рок благодарение на киселината или солта. Сепак, и тие по отворањето треба да се чуваат правилно, најдобро во фрижидер, за да се зачува квалитетот и да се намали ризикот од расипување.
Посебна опасност доаѓа од навиката сосовите да се користат без внимание на хигиената. Ако со нечист нож, лажица или рака што претходно допрела сурово месо се допре амбалажата или отворот на шишето, може да дојде до контаминација. Така, дури и производ со важечки рок може да стане небезбеден.
Старите сосови затоа не се само прашање на вкус. Во фрижидерот често изгледаат безопасно, но ако стојат премногу долго отворени, ако мирисаат поинаку или ако не знаете кога сте ги отвориле, најбезбедната одлука е да завршат во канта, а не во чинија.
