Погледнете што се случува во Скопјанка, фекалии и ѓубре, станарите стравуваат од пожар

Фекалии во Скопјанка течеле во подрумските простории на зградите во скопски Аеродром, објави СДК, откако станарите предупредиле дека се шири неподнослива миризба, дека е загрозено нивното здравје и дека постои опасност од струен удар или пожар ако водата дојде во допир со електричната инсталација.

Станува збор за подрумски и деловни простории во рамките на ТЦ „Скопјанка“, кои се во сопственост на Акционерското друштво за изградба и стопанисување со станбен и деловен простор. Дел од просториите се издадени под кирија на приватни фирми, а дел стојат празни.

Според објавата на СДК, проблемот настанал затоа што препумпната станица, која се наоѓа во празните објекти, не работи. Поради тоа, фекалиите се излеваат низ просториите на нивото „минус еден“, каде што, според станарите, има и осигурувачи за струја.

Станарите тврдат дека никој не реагира на нивните поплаки и бараат итна реакција од Општина Аеродром. Тие предупредуваат дека поплавените делови не се само хигиенски проблем, туку и безбедносен ризик за луѓето што живеат во зградите.

Од Акционерското друштво за стопанисување со деловен простор, директорот Јован Лукаров за СДК изјавил дека одржувањето на препумпната станица не е само нивна одговорност. Според него, сите што користат простор во зградите треба да учествуваат во решавањето и одржувањето, пропорционално на просторот што го имаат.

Со тоа проблемот останува заглавен меѓу станарите, државното акционерско друштво и локалните инспекциски служби. Додека институциите и сопствениците расправаат кој треба да плати и кој треба да реагира, станарите во „Скопјанка“ живеат со фекалии во подрумите, смрдеа и страв дека проблемот може да прерасне во поголема опасност.