Skip to content
Тензии избувнаа пред Специјализираните совети на Косово во Хаг по изрекувањето на пресудата со која поранешниот косовски претседател Хашим Тачи беше осуден на 25 години затвор за воени злосторства.
Дел од демонстрантите кои се собраа во знак на поддршка за Тачи влегоа во судир со холандската полиција. На снимките од протестот се гледа полициска интервенција, а за растерување на насобраните бил употребен и воден топ.
Протести по пресудата беа регистрирани и во Приштина и во Хаг, каде поддржувачите на Тачи и на останатите поранешни лидери на ОВК со денови го очекуваа исходот од судењето. Ројтерс и АП потврдуваат дека одлуката на судот предизвикала бурни реакции меѓу нивните поддржувачи.
Судот во Хаг го прогласи Тачи за виновен за убиство, тортура, сурово постапување и незаконско лишување од слобода за време на војната во Косово во 1998 и 1999 година. Тој ги негира обвиненијата и има право на жалба.
Во истиот предмет беа осудени и поранешните високи функционери на ОВК Кадри Весели, Реџеп Селими и Јакуп Красниќи. Судот истовремено ги ослободи обвинетите од дел од обвиненијата за злосторства против човештвото, оценувајќи дека обвинителството не ги докажало потребните елементи.
🇽🇰🇳🇱 Clash between angry protesters and police in The Hague over the verdict of the Kosovo Specialist Chambers.
— kos_data (@kos_data) September 16, 2026
Police used water to disperse protesters. https://t.co/fsoZ56gw7O pic.twitter.com/uWU3ES6u2l
Пред изрекувањето на пресудата илјадници луѓе протестираа и во Приштина, каде Тачи и останатите поранешни команданти на ОВК и натаму имаат силна поддршка.
