Skip to content
Украинскиот претседател Володимир Зеленски изјави дека сè уште нема прецизен датум за посетата на американските пратеници Стив Виткоф и Џаред Кушнер на Киев, иако, како што рече, таква посета била најавена уште на почетокот на април. Зеленски порача дека би било фер двајцата да дојдат во Украина, откако претходно повеќепати престојуваа во Москва на разговори со руското раководство.
Неизвесноста околу терминот доаѓа само десетина дена откако од украинска страна беа пласирани очекувања дека американската делегација би можела да пристигне по Велигден. Тогаш беше соопштено дека посетата е во фаза на договарање, но дека Белата куќа уште нема дадено конечна потврда за датумот.
Темата е чувствителна затоа што евентуалното доаѓање на Виткоф и Кушнер во Киев би било прва нивна посета на Украина, во време кога Вашингтон се обидува повторно да ги придвижи мировните разговори. Во украинската јавност веќе има забелешки дека американските посредници досега имале повеќе средби со руска, отколку со украинска страна, па затоа Зеленски сега јавно инсистира на порамнотежен пристап.
Одложувањето на посетата се совпаѓа и со поширок дипломатски метеж околу американските контакти со Москва и со други жаришта, што дополнително го отвора прашањето дали Украина во моментов останува во истиот фокус на американската администрација. Засега, пораката од Киев е јасна: подготвеност за средба има, но конкретен датум сè уште нема.