Skip to content
Од СДСМ со реакција за екскурзијата на министерскиот ешалон од владата на Христијан Мицкоски. Оттаму велат дека ‘додека институциите на културата едвај преживуваат, а вработените и понатаму се без исплатени плати, министерот за култура Зоран Љутков, заедно со голема партиска свита, си организираа „дипломатска“ екскурзија во Јапонија’.
„Со него се и министерот Тимчо Муцунски со сопругата, генералниот секретар на Владата и уште неколку „културни авторитети“, наводно за поддршка на ансамблот Танец и „јакнење на културната соработка“. Колку точно лица брои оваа луксузна делегација? Колку народни пари беа потрошени за патувањето во Осака,за авионски билети, сместување, дневници, протоколарни вечери, гардероба и подароци? И што, всушност, ќе донесат назад во Македонија? Освен албум со селфиња, објави за „успешни средби“ и неколку звучни фрази за „интеркултурен дијалог“?
Од СДСМ велат дека организирањето на изложба посветена на Кензо Танге е ироничен потег.
„Врв на иронијата, организирале и изложба посветена на архитектот Кензо Танге, визионерот што го проектираше Скопје по катастрофалниот земјотрес од 1963 година. Истото Скопје кое ВМРО-ДПМНЕ, со истата оваа структура, го изобличи со стиропор и лажен барок преку проектот „Скопје 2014. Па кој има образ сега да го слави Кензо Танге, кога неговото дело беше грубо погазено со партиска стиропорна естетика и кич?“, велат од СДСМ.
Опозициската партија ги повика претставницигте од власта транспарентно да ја објават сумата која ја потрошиле за екскурзијата во Јапонија.
„Граѓаните заслужуваат одговор: Колку ги чинат екскурзиите на Љутков, колку чини оваа парада? И дали културата е само алиби за туристички луксуз?“
пак претходно информираа дека владината делегација предводена од министерот за надворешни работи и надворешна трговија Тимчо Муцински, министерот за култура и туризам Зоран Љутков и генералниот секретар на Владата Игор Јанушев денеска учествувала на националниот ден на светската изложба ЕКСПО 2025 во Јапонија.
Владината портпаролка, Марија Митева, претходно преку видео изјава информираше дека најсилен впечаток во Јапонија на ЕКСПО, оставила точката и настапот на националниот ансамбл „Танец“.
„Македонскиот павилјон изобилува со традиционални изложби, но најсилно и најголемо внимание зазема токму онаа на јапонскиот архитект Кензо Танге, кој го има проектирано Скопје по земјотресот во 1963 година. Како Влада остануваме посветени на афирмација на Македонија. Присуството на ЕКСПО 2025 година е уште еден доказ за тоа“, изјави портпаролката на Владата Митева во видео изјавата.
