Европејките заработуваат 12% помалку од мажите – може ли новата директива на ЕУ да донесе промена?

Европејките во просек заработуваат 12 проценти помалку од нивните машки колеги – и тоа за исти работни позиции. Еден од клучните начини за намалување на овој родов јаз е зголемувањето на транспарентноста во платите. Токму затоа, Европската комисија донесе директива со која се предвидува обврска за компаниите да известуваат за платите според различни категории. Прашањето е: што реално ќе промени овој пропис?

Според Европската конфедерација на синдикати, нетранспарентноста на платите ја чини жените во ЕУ најмалку 4,8 милијарди евра годишно.

Нова директива: транспарентност во огласите, контроли во платите

Поради родовиот јаз во примањата, Европската унија усвои Директива за транспарентност на платите, која треба да биде инкорпорирана во националните законодавства на земјите членки во рок од една година.

Според портпаролката на Европската комисија, Ева Хрнчирова, директивата предвидува различни обврски за големите компании и за малите и средните претпријатија, со цел да се избегне преголемо административно оптоварување. Но, суштината е следна: ако постои разлика во платите помеѓу мажите и жените поголема од 5%, компанијата мора да пријави и објасни зошто.

Дополнително, во огласите за работа ќе мора јасно да стои информација за платата, а на интервју за работа, работодавецот нема да смее да прашува за претходните примања на кандидатите.

Иако директивата не предвидува поединечните плати да станат јавни, вработените ќе имаат право да знаат колку во просек заработуваат нивните колеги што работат исти или слични работи, поделено по пол.

„Не е само закон за еднакви плати – туку за транспарентност“

„Факт е дека и досега дискриминацијата беше забранета со законите во секоја земја-членка на ЕУ. Но, новина е тоа што луѓето ќе можат да видат како се платени во споредба со другите. Затоа ова не е само закон за еднаквост, туку за транспарентност“, вели Јон Санес од консултантската компанија Nordic Reward Partners од Копенхаген за Euronews Србија.

Новата директива предвидува и санкции – од парични казни до забрана за учество во јавни набавки. Главниот предизвик ќе биде спроведувањето, што останува обврска на земјите-членки.