Трагедија од праисторијата: Двајца Homo habilis биле изедени од предатори пред 1,8 милиони години

Нови анализи на фосилни остатоци откриваат морничава судбина на двајца рани човечки предци кои живееле пред околу 1,8 милиони години. Според истражувањето објавено во Journal of Human Evolution, двата примерока – најверојатно од видот Homo habilis – завршиле како жртви на жестоки предатори: крокодил и месојад сличен на леопард.

Фосилите, означени како OH 8 и OH 35, се пронајдени во прочуената клисура Олдувај во Танзанија – еден од најважните археолошки локалитети за проучување на раниот човечки развој. Останките носат јасни траги од каснување, што укажува дека нивните стапала и нозе биле откинати, најверојатно од крокодил со средна големина. Дополнителни оштетувања на коските, вклучително и на вилицата на примерокот OH 7, се совпаѓаат со ознаки од заби на голем мачкест предатор, сличен на денешниот леопард.

Иако не е потврдено дали сите пронајдени фосили припаѓаат на истите индивидуи, научниците не ја исклучуваат можноста дека некои од остатоците можеби се од една истата млада индивидуа, која завршила изедена и од воден и од копнен предатор.

Овој вознемирувачки приказ на смртта открива колку брутален и опасен бил светот во кој живееле нашите предци. „Овие остатоци се сведоштво за тоа колку ранливи биле хоминините во еден свет каде што животот и смртта зависеле од вниманието и среќата“, пишува IFL Science.

Видот Homo habilis, чие име значи „вешт човек“, се смета за еден од првите претставници на родот Homo. Тие биле познати по способноста да изработуваат примитивни алатки и да користат камен за обработка на храна – значајна пресвртница во еволутивниот напредок на човечката линија.

Сепак, алатките не биле доволна одбрана од смртоносните предатори на тогашната Источна Африка.

Ова откритие не само што ја продлабочува нашата перцепција за секојдневниот живот на раните хоминини, туку и нè потсетува дека еволуцијата е исполнета со приказни за преживување, но и за сурова, често трагична, реалност.