Skip to content
Поранешниот српски претседател и носител на листата „Александар Вучиќ – Обединета Србија“, Александар Вучиќ, реагираше на изјавата на хрватскиот премиер Андреј Пленковиќ дека забрзаното вооружување на Србија изгледа како „шопинг-манија“.
Пленковиќ во петокот изјави дека Хрватска внимателно го следи процесот на вооружување на Србија, оценувајќи дека станува збор за „неверојатен процес на вооружување, речиси шопинг-манија по сите делови на светот“. Тој истовремено рече дека соседните земји на Србија треба да се запрашаат зошто Белград толку многу се вооружува.
Вучиќ, коментирајќи ја оваа изјава, рече дека Србија има „производствена манија, шопинг-манија, но нема нациманија“.
„Оваа нациманија е, за жал, најприсутна во Хрватска“, изјави Вучиќ, додавајќи дека Србија, како што тврди, со големо внимание ги следи настаните поврзани со нацистичката идеологија и симболи од Втората светска војна во Хрватска.
Вучиќ истовремено ги стави Пленковиќ, косовскиот премиер Аљбин Курти, поранешниот црногорски претседател Мило Ѓукановиќ и Раде Звицер во ист контекст, тврдејќи дека тие се „нервозни“ и дека вршат притисок во пресрет на изборите во Србија.
Тој рече и дека Србија внимателно го следи, како што го нарече, создавањето сојуз меѓу Приштина, Тирана и Загреб и најави дека Белград ќе продолжи да го следи тој процес.
Од друга страна, Пленковиќ изјави дека Хрватска своите воени капацитети ги развива како средство за одвраќање и дека, како членка на НАТО и ЕУ, се грижи за сопствената безбедност. Според него, хрватскиот одбранбен буџет е тројно зголемен во последните десет години.
Размената на изјави доаѓа во период на зголемено внимание кон вооружувањето на Србија и регионалните безбедносни односи, но и во пресрет на вонредните парламентарни избори во Србија, закажани за 25 октомври. Вучиќ, кој на 27 септември поднесе оставка од претседателската функција, сега ја предводи листата на парламентарните избори.
