Побарувачката за нафта ќе расте најмалку до 2050 година: „Оддалечувањето од фосилните горива е нереална фантазија“

Организацијата на земјите извознички на нафта (ОПЕК) предвидува дека побарувачката за нафта ќе продолжи да расте најмалку до 2050 година.

Во споредба со минатата година, побарувачката ќе се зголеми за 18,6 проценти на околу 123 милиони барели дневно до 2050 година.

ОПЕК, сепак, ги опишува повиците за брзо оддалечување од фосилните горива како нереална фантазија, објавува SEEbiz.

„Побарувачката ќе биде поттикната од економскиот раст, растечкото население, зголемената урбанизација, новите енергетски интензивни индустрии како што е вештачката интелигенција и снабдувањето со енергија на милијарди луѓе кои сè уште ја немаат“, рече генералниот секретар на ОПЕК, Хајтам Ал Гаис, во извештајот.

Тој изјави дека врвот на побарувачката за нафта сè уште не е на повидок.

Прогнозата на ОПЕК, според француската новинска агенција АФП, е спротивна на проценките на Меѓународната агенција за енергија (ИЕА), која минатиот месец објави дека глобалната побарувачка за нафта ќе почне да се намалува во 2030 година, како резултат на зголемувањето на бројот на електрични автомобили и зелената транзиција во производството на енергија.

ИЕА предвидува пад на побарувачката за нафта дури и за Саудиска Арабија, суперсилата на ОПЕК, бидејќи земјата ја заменува суровата нафта со гас и обновливи извори.

Гаис, пак, истакна дека растот на побарувачката за нафта е главно поттикнат од земјите во развој и дека фосилните горива сè уште сочинуваат околу 80 проценти од глобалниот микс на горива, што не се променило значително од основањето на картелот во 1960 година.

Додека повиците на ОПЕК за брз премин од фосилните горива се опишани како нереална фантазија, експертите предупредуваат дека брз премин од фосилните горива е неопходен ако сакаме да го ограничиме глобалното затоплување на 1,5 степени Целзиусови над прединдустриските нивоа.