Skip to content
Судењето против Раде Трајковски – Штекли, првообвинет за организирање и учество во скопското криминално подземје, повторно беше одложено поради дијаметрално различни оцени на двајца психијатри за неговата процесна способност.
Вештакот на одбраната, д-р Ѓорѓе Хаџи-Ангеловски, тврди дека обвинетиот боледува од шизофренија и сложено психотично растројство. Во извештајот се наведува дека Трајковски три години разговара со „имагинарен учител“, поставил камери во домот убеден дека „албанската мафија“ го следи и има халуцинации со кои „нарушено го доживува телото и органите“. Заклучокот на вештакот е недвосмислен: обвинетиот не е во состојба да се брани и треба да биде хоспитализиран на Клиниката за психијатрија.
Спротивен став има вештакот на Обвинителството, д-р Оливера Суботин-Поповска од Специјалната болница „Бардовци“. Нејзиното вештачење оценува дека Трајковски е пресметлив, ги разбира судските дејства и може рационално да учествува во постапката.
Судијата Илија Трпков наложи на следното рочиште двајцата психијатри лично да ги образложат своите дијагнози и методологијата на проценка. Претходната расправа беше одложена бидејќи обвинетиот доби епилептичен напад во казнено-поправниот дом „Шутка“ и итно беше пренесен на Клиниката за неврологија.
Додека судот не утврди единствена стручна позиција за менталната состојба на Трајковски, процесот останува во застој, а јавноста – без одговор кога ќе продолжи разгледувањето на доказите за неговата наводна улога во скопските изнуди и рекет.
