Skip to content
Министерството за здравство најави итни и вонредни надзори во приватните болници по информациите ко во јавноста ги пласираше Д-р Кедев пред неколку дена, дека на пациенти им се прават интервенции без јасна медицинска индикација, со цел профит. Се формираат тимови што ќе ја проверуваат медицинската документација, индикациите и исходите на спорните зафати, а ако се утврдат злоупотреби ќе следуваат санкции.
Ресорот најавува и посилна размена на податоци преку „Мој термин“ помеѓу јавните и приватните установи, за полесно да се уочуваат сомнителни обрасци во упати и интервенции. Пациентите се повикуваат активно да поставуваат прашања и, кога има дилема, да побараат второ стручно мислење пред инвазивна процедура.
Чекорите следуваат по јавни обвинувања дека во дел од приватниот сектор се вршат непотребни стентирања и хируршки зафати. Министерството потсетува дека постојат стандарди, протоколи и законски постапки и апелира јавната комуникација да биде одмерена и заснована на проверливи информации, за да не се генерализираат поединечни случаи на цел систем.
Фокусот, според најавите, е на заштита на пациентите од непотребен ризик и трошоци, зачувување на интегритетот на здравствениот систем и рационално користење на јавните пари каде што интервенциите се рефундираат. Очекувањата се дека првичните наоди од вонредните контроли ќе дадат појасна слика за обемот на проблемот и потребните регулаторни корекции.