Пет новинари меѓу 20-те убиени во израелскиот напад врз болница во Газа

Израел ја погоди главната болница во јужна Газа со двоен ракетен напад во понеделник, при што загинаа најмалку 20 лица, вклучувајќи четворица новинари, соопштија медицински претставници, пренесуваат Би-Би-Си и Асошиетед прес.

Првиот напад го погоди горниот кат од една од зградите во болницата Насер. Неколку минути подоцна, додека новинарите и спасувачите во портокалови елеци се упатија по надворешно скалиште кон местото на настанот, втора ракета го погоди истото место, изјави д-р Ахмед ал-Фара, раководител на педијатрискиот оддел на Насер.

Меѓу убиените беше и 33-годишната Маријам Дага, визуелна новинарка која работела за Асошиејтед Прес. Дага редовно известуваше за повеќе медиуми од болницата Насер, вклучувајќи и неодамнешна сторија за Асошиејтед Прес за лекарите кои се борат да спасат деца од глад.

Ал Џезира и Ројтерс, исто така, потврдија дека нивните новинари и хонорарци се меѓу убиените.

Израелската војска во соопштение потврди дека погодила цели во областа на болницата. Се вели дека ќе спроведе истрага за инцидентот и дека „жали за каква било штета на незаинтересирани лица и не ги таргетира новинарите како такви“.

Ова беше најновиот од повеќекратните израелски напади врз болниците во текот на војната. Болниците беа преполни со ранети од војната, а сега и со зголемен број неухранети, бидејќи делови од Газа тонат во глад. Палестинците се соочуваат и со ескалирана израелска офанзива во градот Газа, што се заканува со поголем бран на раселување.