Шукова го најави враќањето на БТР системот што го стопира Арсовска

Кандидатката за градоначалничка на Скопје и потпретседателка на СДСМ, Каја Шукова, најави дека ќе го врати проектот за БТР (брз автобуски превоз) што, како што рече, бил стопиран во мандатот на Данела Арсовска. Таа оцени дека јавниот превоз е „критична слаба точка“ и најави итен почеток на реализација на коридори резервирани исклучиво за автобуси.

Според најавата, првата линија треба да ја поврзе трасата Ѓорче Петров – Центар – Ново Лисиче, со должина од околу 13 километри, 21 автобуска постројка и два терминали. Предвидени се 29 нови еколошки автобуси, со проектиран дневен капацитет од околу 65.000 патници. Шукова вели дека за проектот одамна се обезбедени 40 милиони евра преку ЕБОР и дека линијата би била оперативна до средината на 2028 година.

Паралелно со првата траса, најавена е работа и на втората, во насока север–југ, како и набавка на дополнителни еколошки автобуси за останатите градски линии. Планот опфаќа ревитализација на две депоа и поставување ред и доверлив распоред, со цел намалување на доцнењата и гужвите.

Шукова тврди дека сегашниот систем е недоволно безбеден и нефункционален, со укинати или нередовни приградски линии, и дека БТР треба да донесе побрз, почист и предвидлив превоз. Таа најави дека реализацијата би започнала веднаш по преземање на функцијата.