Планирани над 990 милиони денари за плати на пратеници и вработените во собраниската служба, 122,5 милиони денари за уредување на зоната околу Собранието

Предлог-буџетот на Собранието треба да ја добие поддршката на пратениците на пленарна седница.

На седницата на Буџетскот совет, собраниската служба соопшти дека се планирани средства за следните намени:

-За Потпрограма 20 за реализација на активностите се планираат средства во вкупен износ од 996.800.000 денари и тоа за следните намени: за плати и надоместоци од плати се планираат средства од 677.300.000 денари, платите и надоместоците на плати се утврдени согласно постојната законска регулатива за исплата на плати за вработените, пратениците и функционерите во Собранието.

-Пресметката за потребните средства за 2026 година предвидува плати и надоместоци на плати за 244 собраниски службеници, 35 помошни технички лица, 11  вработени собраниски службеници, 11 посебни државни службеници во Кабинетот на претседателот, потпретседателите, генералниот секретар на Собранието, 120 пратеници, со пресметка за дополнителни средства за претседатели на работни тела, координатори на пратенички групи и генералниот секретар, како и замениците на генералниот секретар.

-Планирани се нови вработувања согласно Предлог-годишниот план за 2026 година за 14 собраниски службеници  и едно помошно техничко лице по пат на јавен оглас и 10 унапредувања на интерен оглас. Врз основа на Законот на Собранието, Стратешкиот план на Собранието, а пред се, имајќи ги во предвид и постојаните тековни активности на Собранието, проценетите вредности на јавните набавки, како и проценка на вредностите за плати, и надоместоци на плати, согласно потребите на Собранието во Буџетот за 2026 година за раздел 02001 на Собранието потребни се вкупно 1.195.000.000 денари на сметка на основен буџет 637 кои се усогласени со вкупниот износ во проекцијата за фискалната стратегија за  2026 година и вкупно 21.500.000 на сметка на донации 785, рече на денешната седница на Буџетскиот Совет генералната секретарка на Собранието Марина Димовска. 

Во Буџетот на Собранието за 2026 година се планираат средства во вредност од 122,5 милиони денари за уредување на површината на просторот околу објектот на Собранието, кој што со закон е прогласен за безбедносна зона. 

Беше соопштено дека средствата се планирани за материјали, поправки и одржување, договорни услуги, оперативни расходи, урбана опрема, подготвување на проект за безбедносна зона, изградба на други објекти, односно безбедносна зона и надзор над изградба на истите.

Направено е поради усогласување на новите акти за внатрешна организација и систематизација на работните места во служба на Собранието. Новите акти се направени врз основа на функционална анализа на службата на Собранието, што беше подготвена со тим експерти кои се ангажирани од страна на Фондацијата Вестминстер. На овој начин, тука правиме само една техничка измена. Немаме промена во однос на вработувањата и за истите ќе бидат распишани огласи за 2025 година откако ќе завршат локалните избори.

Буџетскиот Совет ја изгласа одлуката за давање финансиска согласност на Годишниот план за 10 унапредувања и 15 нови вработувања во Службата на Собранието за 2026 година.

За стоки и услуги се планираат вкупно 220 милиони денари кои се утврдени согласно реалните потреби на Собранието. На ставка за патни и дневни расходи планираните средства се за исплата на надоместоците за патни расходи на пратениците со пресметка до 20 проценти од вредноста на горивото по изминат километар, за набавка на авио билети, сместување и дневници во странство за вработените во службата на Собранието  и за пратениците со цел остварување на меѓународна соработка.

За ставката привремени вработувања планирани се вкупно 24 надворешни соработници советници кои Собранието ќе ги ангажира за потребите на пратеничките групи, а за капиталните расходи се планираат вкупно 96.500.000 денари кои меѓу другото ќе бидат потрошени за опрема за ИП телефони, сервер клима, уреди, обновување на систем за ПП, заштита во сервер соба, безбедносен и системски софтер, дигитализација на деловните процеси, систем за дигитално потпишување на документи, веб базирано на софтверско решение за корисничко дигитално потпишување и надградба на постоечки системи за адаптивно одржување.

Буџетскиот Совет денеска ја изгласа и одлуката за обезбедување средства за финансирање на договорни услуги за асистентите на пратениците, како и за покривање на оперативни расходи за функционирање на канцелариите за контакт на пратениците со граѓаните за 75 асистенти, кои ќе добиваат по 12 илјади денари.

Во потпрограмата  22 се предвиудени зафати на собраниската зграда – за поправка на зградата, платформи за инвалидни лица, проект на цевководна инсталација, се предвидува и тоалет за лица со хендикеп и проект со ревизија за техничко – технолошко реновирање на салата „Борис Трајковски“ . 

За Собранискиот канал за 2026 година предвидени се средства во износ од 8.800.000 денари. За потребите на Парламентарниот институт планирани се 15.000.000 во однос на организирање на обуки, посети на Собранието, патни и дневни расходи, поправки, одржување на системите за опрема, оперативни расходи, софтвер за дигитализација на извештаи и статистика…

На седницата, членовите на Буџетскиот Совет го изгласаа и Стратешкиот план на Собранието на Република Северна Македонија за периодот 2026-2030 година, кој ќе содржи шест стратешки цели на законодавниот дом – функционален, отворен, дигитален, безбеден парламент, со парламентарна дипломатија и ефикасни услуги од службата.