Првпат по една деценија: Германија повторно со над три милиони невработени

Економските турбуленции и летниот застој на пазарот на трудот ја вивнаа невработеноста во Германија на над три милиони лица – бројка која последен пат беше забележана пред речиси десет години.

Сојузната агенција за вработување денеска (29 август) објави дека бројот на невработени во август пораснал за 46.000 лица и достигнал 3,025 милиони. Последен пат толку висока бројка е регистрирана во февруари 2015 година. Стапката на невработеност во моментов изнесува 6,4 проценти, што претставува пораст од 0,1 процентен поен.

„Поради летниот распуст, многу компании ги одложуваат новите вработувања за крајот на сезоната. Затоа невработеноста повторно скокна над три милиони,“ изјави директорката на агенцијата, Андреа Налес. Таа предупреди дека пазарот на труд и натаму е под притисок на економскиот пад, додавајќи: „Сè уште сме на дното. Не сме излезени од кризата.“

И покрај мрачната слика, постојат знаци на стабилизација – бројот на лица со скратено работно време полека се намалува, а економистите очекуваат есенското закрепнување да донесе благ пад на невработеноста. Но, Налес предупреди дека без нов економски замав, „веќе во зима повторно може да ја преминеме границата од три милиони.“

Пазарот на труд во Германија е поделен: секторите здравство, нега и јавни услуги вработуваат, додека индустријата продолжува да слабее.

Позитивен сигнал е тоа што, прилагодено за сезонските колебања, бројот на невработени во август дури се намалил за 9.000 лица во споредба со јули, иако аналитичарите очекуваа пораст. Сепак, во однос на август минатата година, невработеноста е поголема за 153.000 лица.

Канцеларот Фридрих Мерц, реагирајќи на податоците, изјави дека трендот не е изненадувачки, но е „јасен доказ за неопходноста од структурни реформи за раст и вработување.“

Германската економија и натаму се бори со последиците од двегодишната рецесија – брутодомашниот производ оваа пролет се намали за дополнителни 0,3 проценти. Индустријата трпи под товарот на високите енергетски трошоци, а дополнителен удар е и протекционистичката царинска политика на американскиот претседател Доналд Трамп, која сериозно ја погодила германската извозна економија.