Командант на армијата: Иран активно се подготвува за нов судир со Израел

Тој нагласи дека иранската нуклеарна програма „останала недопрена“, и покрај обидите на Израел и Западот да ја уништат за време на последниот конфликт.

За време на инспекција на воени единици во Исфахан, Табриз и Хамадан, Хатами оцени дека „израелските окупациски сили, иако уживаа врвна воена и технолошка поддршка од Западот, вклучително и од НАТО, доживеаја сериозен неуспех“ за време на неодамнешната дванаесетдневна ескалација.

„Нуклеарната програма се темели на домашни капацитети кои не можат да бидат уништени со сила,“ рече Хатами, пренесува Middle East Monitor.

Според него, во одбраната на земјата учествувале копнените, воздушните и противвоздушните сили на армијата, како и Револуционерната гарда, паравоената организација Басиж, па дури и обични граѓани.

„Израел и неговите сојузници се обидоа да ги осакатат иранските системи за противвоздушна одбрана како дел од интегриран план, но одбраната остана цврста и ја покажа својата ефикасност во спречувањето на заканите,“ истакна тој.

Хатами додаде дека целта на нападите била елиминација на иранскиот нуклеарен капацитет и внатрешна дестабилизација на земјата.

Тој посебно го пофали „невиденото единство на иранскиот народ“ за време на конфликтот, оценувајќи го како клучен фактор за зачувување на безбедноста.