Вилијам и Кејт ги предводеа почестите за кралицата Елизабета II на трета годишнина од смртта

Три години по смртта на кралицата Елизабета Втора (8 септември 2022), британската јавност повторно ѝ оддаде почест на најдолговечниот монарх на Обединетото Кралство. Престолонаследникот принцот Вилијам и принцезата од Велс, Кетрин, ја предводеа комеморацијата со посета на огранок на Националната федерација на женски институти (WI) во Санингдејл – организација која со децении ѝ беше блиска на покојната кралица.

Кралицата Елизабета била членка на WI од 1943 година и од 2003 година ја предводеше локалната секција во Сандрингам, традиционално присуствувајќи на јануарските состаноци додека здравјето ѝ дозволуваше. Токму оваа долготрајна врска со женските институти беше причината Вилијам и Кејт да изберат комеморативна средба со членките на WI, во ненаметлив, но симболично силен гест.

Во исто време, принцот Хари се врати во Обединетото Кралство и во приватност ѝ оддаде почит на својата баба на нејзиното последно почивалиште во капелата „Сент Џорџ“ во замокот Виндзор, оставајќи венец и цвеќе. Иако браќата се најдоа на мала оддалеченост еден од друг, не се очекува средба меѓу Вилијам и Хари за време на оваа посета. Хари, сепак, би можел да се види со својот татко, кралот Чарлс – потенцијална средба која би била прва по скоро две години.

Кралот Чарлс III и кралицата Камила престојуваат во Балморал – местото каде што Елизабета почина на 96-годишна возраст – и без јавен настан го одбележуваат денот на нејзиното упокојување и денот на неговото стапување на престолот. На официјалните канали на кралското семејство беше споделена порака во сеќавање на кралицата, придружена со фотографија од нејзиниот долг владетелски период.