Skip to content
Минималната плата да се зголеми на 600 евра за тие што имаат завршено само средно школо, а да биде 800 за оние кои завршиле факултет, побара денеска ДУИ на прес-конференција во Собранието.
„Синдикатите со право укажуваат дека владата ја држи минималната плата меѓу најниските во регионот. При тоа, во буџетот за 2026-тата година нема предвидено средства за суштинско зголемување на платите.
ДУИ и пратеничката група на Европскиот фронт сметаат дека ова е структурна неправда и огромна економска грешка. Не може власта да очекува продуктивна економија со работници кои живеат на раб на сиромаштијата. Затоа бараме минималната плата да се усогласи со реалните трошоци на живот и за да биде на ниво со регионалниот просек.
Почитувани, 390 евра не се доволни за живот. Тие се доволни само за преживување. Затоа минималната плата мора да биде 600 евра за лицата со средно образование, а 800 евра за лицата со високо образование“, рече Блерим Беџети од ДУИ на денешната прес конференција во Собранието.
Минималната плата во овој момент изнесува 24.400 денари, а Синдикатите бараат таа да изнесува најмалку 500 евра, додека Владата за износот на минималната плата упатува на дијалог помеѓу Синдикатите и работодавците.
