МИТ разви нов неинвазивен уред за мерење шеќер во крвта

Истражувачки тим од Институтот за технологија во Масачусетс (МИТ) претстави технологија што би можела целосно да го промени начинот на кој дијабетичарите го следат нивото на гликоза. Новиот метод, базиран на Раманова спектроскопија, овозможува проверка на шеќерот во крвта без употреба на игли со што би се избегнало секојдневното боцкање на прстите.

Технологијата користи блискоинфрацрвена или видлива светлина за да го открие хемискиот состав на ткивото, и е вградена во уред со големина на кутија за чевли што успешно ги измерил нивоата на гликоза кај здрави волонтери. Притоа, резултатите се покажале речиси идентични со комерцијалните уреди за континуирано следење на гликоза, кои бараат жица имплантирана под кожата и често предизвикуваат иритација.

Студијата, објавена во списанието Analytical Chemistry, ја водела постдокторантката Аријана Бреши, во соработка со професорот Питер Со и истражувачи од јужнокорејската биотехнолошка компанија Apollon Inc. Тимот успеал да го поедностави уредот со тоа што ја намалил потребната спектрална анализа од околу 1.000 ленти на само три, една за гликозата и две за позадински мерења. Овој чекор драматично ги намалува големината и цената на уредот.

Во клинички тест на МИТ, волонтерите држеле рака врз уредот, додека инфрацрвениот зрак минувал низ кожата. Секое мерење траело околу 30 секунди, а резултатите биле земани на секои пет минути во период од четири часа. Истражувачите внимателно следеле промени во нивото на гликоза откако испитаниците консумирале гликозни напитоци и откриле дека точноста на неинвазивниот уред е споредлива со онаа на два комерцијални инвазивни монитори.

Потоа, тимот развил уште помал прототип, со големина на мобилен телефон, кој веќе се тестира како преносен монитор кај здрави и предијабетични испитаници. Следната година, во партнерство со локална болница, ќе започне поширока студија што ќе вклучи и пациенти со дијабетес.

Истражувачите работат на понатамошно минијатуризирање на технологијата, со крајна цел да се создаде уред со големина на паметен часовник. Дополнително, анализираат како да обезбедат висока точност кај луѓе со различни тонови на кожа, предизвик што е клучен за широката примена на уредот.

Ако развојот продолжи со сегашното темпо, оваа технологија би можела да претставува револуција во следењето на гликоза и значително да го подобри животот на милиони дијабетичари ширум светот.