Skip to content
Францускиот претседател Емануел Макрон предупреди дека евентуално загрозување на суверенитетот на европска земја и нејзините сојузници би имало „последици без преседан“, во контекст на актуелните тензии околу Гренланд. Според неговата изјава, Франција внимателно ја следи ситуацијата и ќе дејствува во целосна солидарност со Данска и со нејзиниот суверенитет.
Пораката доаѓа откако американскиот претседател Доналд Трамп повторно ја отвори темата за преземање контрола врз арктичката територија, која е автономна во рамките на Кралството Данска и има стратешко значење поради геополитиката и ресурсите на Арктикот. Во Париз, изјавата на Макрон беше пренесена како став на Елисејската палата дека Франција не ги потценува сигналите кои се испраќаат во јавноста во врска со Гренланд.
Во Брисел, претседателката на Европската комисија Урсула фон дер Лајен порача дека врската меѓу Европската Унија и Гренланд е силна и дека жителите на Гренланд можат да сметаат на поддршка од ЕУ, при што го нагласи и приоритетот на арктичката безбедност.
Тензиите добиваат и дипломатска димензија, откако беше најавено дека шефовите на дипломатиите на Данска и на Гренланд ќе имаат средба во Белата куќа со американскиот потпретседател Џ.Д. Венс, по неколкунеделните изјави и притисоци што ја отворија дебатата за суверенитетот и безбедносната архитектура меѓу сојузниците.