5 тони марихуана од Македонија: зошто Обвинителството молчи?

Рекордната заплена на околу пет тони марихуана во Србија – случај што таму веќе се води како организиран криминал – ја отвори најнепријатната дилема за македонските институции: ако српското обвинителство тврди дека дрогата била набавена во Северна Македонија и префрлана преку граница како дел од мрежа, како е можно дома да нема јасна, видлива реакција што ќе ја пресече секоја сомнеж и ќе ја утврди одговорноста?

Според информациите што ги пренесоа српските медиуми, марихуаната била откриена на 29 јануари 2026 година во реонот на селото Коњух, кај Крушевац, а српската полиција заплената ја оцени како најголема во историјата на земјата, со проценка на вредноста меѓу 7 и 10 милиони евра. Во истрагата се вклучени Тужилаштвото за организиран криминал и судските органи во Белград, а дел од осомничените веќе добија мерки притвор.

Најкритичниот детал за Македонија е во соопштенијата на српската страна: Тужилаштвото за организиран криминал соопштува дека групата дејствувала меѓународно и дека, од почетокот на јануари, во Северна Македонија набавила околу пет тони марихуана, која потоа, според нивната реконструкција, била пренесувана преку граница до магацин/објекти во Србија и преземана за понатамошна продажба. Во истиот материјал се наведува и дека за организаторот се предлага потерница, бидејќи е во бегство.

Токму тука почнува домашната политичка експлозија. На прес-конференција, генералниот секретар на СДСМ, Александар Саша Димитријевиќ, праша дали „5 тони дрога се доволни“ за Обвинителството конечно да реагира и да отвори истрага, со теза дека шверц од ваков обем не може да се случи без „поддршка и заштита“ од структури во власта. Тој директно ја постави дилемата како пет тони можеле да поминат преку македонската граница и зошто институциите молчат.