Skip to content
СДСМ излезе со предлог минималната плата да се зголеми на 600 евра преку ребаланс на Буџетот и кратење на, како што го нарекоа, „луксузот на власта“, со паралелна мерка за поддршка на приватниот сектор преку субвенционирање на придонесите. На прес-конференција, потпретседателката Јована Тренчевска тврдеше дека во државната каса има простор за ова, ако приоритетите се пренасочат од комфор на функционери кон плати и ликвидност на фирмите.
Според партиските пресметки, за минимална плата од 600 евра би биле потребни околу 7,5 милијарди денари, односно 120 милиони евра. Како главен извор на средства го посочија кратењето од 20 до 30 проценти на ставката „стоки и услуги“ – каде што, според нив, влегуваат возила, мебел, патувања, репрезентации и договорни услуги – што би донело околу 130 милиони евра. Дополнително, со кратење на „разни трансфери“, односно хонорари и времени вработувања, би се обезбедиле уште околу 75 милиони евра, со што, според нивната рамка, вкупниот „простор“ оди од 130 до над 200 милиони евра.
Клучната порака на ВМРО-ДПМНЕ беше индиректна: СДСМ ја отфрла тезата дека раст на минималната плата автоматски ќе ја загрози економијата или ќе предизвика затворање работни места. Во тој дел, Тренчевска потсети дека во нивниот мандат минималната плата пораснала од 8.000 на 22.000 денари и дека тоа, според нив, не предизвикало колапс, туку зголемена потрошувачка и домашно производство.
Предлогот доаѓа во момент кога дебатата за минималецот повторно е врзана за протестниот притисок и мартовското законско усогласување. Во јавноста веќе циркулираат податоци дека минималната плата во државата е околу 24.379 денари (околу 397 евра) и дека во март се очекува усогласување од приближно 1.500 до 2.000 денари, според формулата.
Паралелно, Сојуз на синдикати на Македонија ја држи линијата „600 евра минималец“ како политичко-економски праг, со аргумент дека растот на трошоците на живот ја изеде куповната моќ, а без линеарно придвижување на платите ќе се зголемува јазот меѓу трошоци и приходи.