Како со вештачка интелегенција да купиме евтини авионски карти?

Експерт за вештачка интелигенција развил алатка која може да анализира илјадници комбинации од рути, датуми и аеродроми и така значително да ја намали цената на авионските билети. Со методологија што не е изолиран „трик“, туку структурирана постапка, тој успеал да ја намали цената на авионските карти од 1.260 долари на 118 долари.

Првиот чекор е промена на логиката на пребарување. Наместо конкретен лет за специфичен датум, AI системот функционира како анализатор на цени и ги испитува сите можни опции помеѓу пошироки географски области, без ограничувања за аеродроми или авиокомпании.

Следно, системот проверува алтернативни аеродроми за поаѓање и пристигнување. Изборот на секундарен аеродром може драстично да ја намали цената, иако бара дополнителен превоз. Клучна улога има и сегментацијата на патувањето, наместо еден повратен билет, AI предлага различни делови од рутата, често со различни авиокомпании или долги престои, откривајќи тарифни комбинации што обичните пребарувачи ги игнорираат.

Временската флексибилност е исто така клучна. Наместо да се поместуваат датумите за еден или два дена, вештачката интелигенција гледа во големи временски периоди на датуми и ги споредува ценовните обрасци во текот на цели недели, идентификувајќи кратки периоди со остри падови на цените.

Системот не купува билети, туку само ја идентификува најдобрата рута и цена. Потоа, патникот ги потврдува резултатите на пребарувачите за летови или директно на веб-страниците на авиокомпаниите. Методот не користи скриени цени или нелегални практики, AI едноставно им помага на патниците да откријат опции што најчесто остануваат невидливи за обичните корисници.

Главната поента е дека вештачката интелигенција не ја намалува цената на билетот сама по себе, туку ја подобрува видливоста на оптималните опции, овозможувајќи значителни заштеди и пофлексибилно планирање на патувањето.