Савески стапи на функција, граѓаните ќе го држат за збор и дела!

Ненад Савески денеска даде свечена изјава во Собранието и официјално стапи на функцијата државен јавен обвинител, откако ден претходно беше избран со 66 гласа „за“, два „против“ и осум воздржани. Со тоа обвинителството доби нов прв човек по оставката на Љупчо Коцевски, а јавноста доби нов сет ветувања за тоа како ќе изгледа неговиот мандат.

Во првата изјава по стапувањето на функцијата, Савески рече дека политичките партии нема да влијаат врз него и дека обвинителството мора да работи независно од дневната политика. Тој порача дека секој јавен обвинител има законска обврска да постапува по тековните предмети и дека нивната работа „ниту почнува, ниту завршува“ со него.

Савески најави и дека нема да има приоритетни предмети, ниту „предмети во фиока“, туку дека за него секој предмет има ист интерес и иста тежина. Во таа насока, тој вети отчетност и транспарентност во работата на секој обвинител, нагласувајќи дека сите предмети решаваат човечки судбини и дека селективна правда не смее да има.

Новиот државен обвинител рече и дека за посериозна борба против криминалот на обвинителството му е потребна поголема финансиска поддршка. Според него, без подобри услови за работа и посилна институционална поддршка, тешко може да се очекуваат резултати какви што ги бараат и граѓаните и системот.

Савески е роден во 1976 година, живее во Гостивар и е магистер по казнено право. Од 2016 година е судија во Основниот кривичен суд Скопје, во Одделот за организиран криминал и корупција, а претходно работел како јавен обвинител и како стручен соработник во судството. Неговиот избор беше поддржан од владејачкото мнозинство, додека опозицијата не застана зад кандидатурата.