Skip to content
Островот Харг, клучната иранска нафтена точка преку која минува најголемиот дел од извозот на сурова нафта, влезе во кругот на сценарија што Вашингтон ги разгледува во новата фаза од воената ескалација со Иран. Но, и покрај драматичните наслови, засега нема официјална одлука за копнена инвазија, туку станува збор за опции што сѐ уште се разгледуваат во рамки на пошироката стратегија за притисок врз Техеран и за отворање на Ормускиот Теснец.
Американскиот воен апарат веќе испраќа дополнителни маринци и бродови во регионот, а меѓу разгледуваните можности се спомнуваат обезбедување на теснецот, распоредување сили долж иранскиот брег и евентуално присуство на Харг. Сепак, пораката што излегува од последните информации е дека не се зборува за класична, масовна инвазија по моделот на Ирак или Авганистан, туку за ограничени и тесно дефинирани операции со конкретна воена и енергетска цел.
Токму затоа Харг станува чувствителна точка не само за Иран, туку и за глобалниот нафтен пазар. Островот е јазол преку кој се движи околу 90 проценти од иранскиот нафтен извоз, па секоја закана кон него веднаш се претвора во порака до пазарите, со ризик од дополнителен раст на цените и нова нестабилност во снабдувањето. Во таков контекст, евентуална операција врз Харг не би била само воен потег, туку и обид да се удри врз економскиот нерв на Техеран.
Иран веќе возврати со порака дека секој напад врз неговиот јужен брег или островите би можел да доведе до минирање на пристапните рути во Заливот и до уште подлабока блокада на пловидбата. Тоа значи дека приказната за Харг повеќе не е само прашање дали Америка е „на чекор“ до копнена акција, туку дали следниот потег ќе отвори уште поширок фронт во енергетската и воената пресметка што веќе ги оттурнува цените нагоре и ја држи целата област на работ на нова ескалација.