Skip to content
Комисијата за култура на СДСМ соопшти дека платите во културата, според нив, се исплаќаат спротивно на Општиот колективен договор, откако министерот за култура Зоран Љутков, одговарајќи на пратеничко прашање, посочил дека мартовската плата ќе се исплаќа „по упатство“ потпишано лично од него. Во партиското соопштение, ваквиот пристап е претставен како јасна потврда дека Владата предводена од Христијан Мицкоски свесно навлегува во веќе утврден систем на права и обврски на вработените во културата.
Според Комисијата, тоа не е техничка или административна грешка, туку свесно дерогирање на правниот поредок. Оттаму тврдат дека колективниот договор не е препорака, туку обврзувачки акт што мора да се почитува, и дека ниту еден министер нема право со интерно упатство да ги менува или намалува стекнатите права на културните работници. Во соопштението се наведува и дека со ваквиот потег Владата испраќа порака дека законите важат селективно и само кога тоа ѝ одговара.
Комисијата дополнително предупредува дека поради ваквото постапување, средства што законски им следуваат на вработените во културата сè почесто завршуваат на сметки на адвокатски друштва ангажирани од самите институции. Наместо парите да одат кај културните работници, се трошат на судски трошоци и адвокатски услуги, што, според соопштението, претставува директна штета за буџетот. Оттаму оценуваат дека ова е особено загрижувачко во сектор што со години е финансиски потценет, кадровски ослабен и системски игнориран.
Комисијата за култура на СДСМ бара итно почитување на Општиот колективен договор и исплата на платите согласно со закон, јавно повлекување на спорното упатство, преземање одговорност од министерот, прекин на практиката со ангажирање адвокатски друштва за спорови што државата однапред ги губи, како и гаранции дека во иднина нема да се носат одлуки што ги суспендираат правата на вработените. Во соопштението се наведува и дека СДСМ ќе продолжи да ги брани интересите на културните работници.