„Вашингтон пост“: Пентагон се подготвува за неколкунеделни копнени операции во Иран

Американскиот весник „Вашингтон пост“ објавува, повикувајќи се на официјални лица, дека Пентагон се подготвува за неколкунеделни копнени операции во Иран и дека останува неизвесно дали претседателот Доналд Трамп ќе одобри планови за распоредување на копнени трупи.

Како што објавува весникот, американските планови укажуваат дека ваквите копнени операции нема да претставуваат инвазија на Иран, туку ќе вклучуваат упади на сили за специјални операции и конвенционални пешадиски трупи, објавува денес Би-Би-Си.

Се верува дека Американците имаат повеќе од 4.000 маринци на бродови што се упатуваат кон Заливот, а падобранците од 82-та дивизија се во состојба на готовност и разговараат за дополнителни засилувања.

Одделно, вчера Централната команда на САД објави дека воениот брод „УСС Триполи“ пристигнал во регионот. Во објава на социјалните медиуми се вели дека бродот превезувал единица од околу 2.500 морнари и маринци со транспортни и борбени авиони, објави АП.

Бродот „УСС Триполи“, амфибиски јуришен брод, како и елементи од 31-та експедициска единица, вообичаено се стационирани во Јапонија. Тие спроведуваа воени вежби во областа околу Тајван кога пред речиси две недели беше издадена наредбата да се оди на Блискиот Исток.

Централната команда на САД објави дека покрај маринците, бродот „Триполи“ носи транспортни и борбени авиони во регионот. На „УСС Боксер“ и на уште два брода со друга единица на маринците им беше наложено да продолжат кон регионот од Сан Диего.