ТИТАН Усје: Националната регулаторна рамка за заштитата на животната средина е усогласена со таа на ЕУ и ние во целост ја почитуваме

ТИТАН Усје работи во целосна согласност со законот и со сите важечки подзаконски акти, a преку широка примена на Најдобрите Достапни Техники (BAT) во повеќе области од работењето постојано е под границите на регулаторните барања. Компанијата инвестираше во најсовремени системи со вреќести филтри кои обезбедуваат висока ефикасност, како и напредни производствени процеси водени со AI технологии и оптимизација во реално време. Овие технологии овозможуваат стабилен, прецизно контролиран процес со постојано ниски емисии – честопати надминувајќи ги споредливите инсталации во многу земји од ЕУ, се вели во соопштението на компанијата доставено до медиумите.

Националната регулаторна рамка што ја уредува заштитата на животната средина е усогласена со европските стандарди и е хармонизирана со законодавството на ЕУ. ТИТАН Усје целосно се придржува до оваа рамка и проактивно го следи развојот на регулативата и на национално и на европско ниво. Нашата Интегрирана А – еколошка дозвола е развиена во согласност со националното законодавство, кое е исто така засновано на европските принципи.

Емисиите во ТИТАН Усје континуирано се следат преку 24-часовен независен систем, со податоци кои се јавно достапни и редовно се доставуваат до надлежните органи и медиумите. Методологијата за следење е целосно усогласена со практиките на ЕУ.

Независниот систем за континуирано следење на емисиите (CEMS) е инсталиран од германската компанија Endress Hauser SICK, во согласност е со стандардите за сертификација на TÜV Германија и гарантира дека мерењето на емисиите, обработката на податоците и известувањето се целосно автоматизирани и не можат да бидат под влијание на операторот. Системот е дизајниран да работи автономно, при што корисниците имаат пристап до податоците само за цели на прегледување, без можност за менување на резултатите.

Најдобрите достапни техники (BAT) мора да се разберат и применат во нивниот целосен технички и оперативен контекст. Селективното или произволно толкување на поединечните мерки за BAT може да доведе до неточни заклучоци. Имплементацијата на BAT значително варира низ европската цементна индустрија, во зависност од локалните услови и  достапноста на истите.

На пример, цементарниците во ЕУ користат до 90% алтернативни горива како дел од воспоставените практики на кружна економија. Спротивно на тоа, во нашата земја достапноста на алтернативни горива е ограничена поради неразвиеноста на системите за кружна економија и ограничувањата за увоз. Како резултат на тоа, уделот на алтернативни горива во домашното производство на цемент е приближно 5%. Оваа структурна разлика покажува зошто директните споредби на поединечните најдобри достапни техники (BAT) не се соодветни без да се земат предвид пошироките системски услови.

Како одговорен член на заедницата, ТИТАН Усје активно ја следи и придонесува во јавната дебата за прашања од областа на животната средина на транспарентен начин и со комуникација базирана на факти. Како дел од Групацијата ТИТАН, компанијата се придржува до меѓународно признатите најдобри практики и ESG стандарди, потврдувајќи ја својата долгорочна посветеност на заштитата на животната средина, поддршката на заедницата и доброто корпоративно управување.