Астронаутите на НАСА ќе останат кратко без контакт додека минуваат зад Месечината

Четворицата астронаути од мисијата „Артемис II“ влегуваат во еден од најчувствителните делови од летот, кога леталото „Орион“ ќе мине зад Месечината и околу 40 минути ќе нема директна комуникација со Земјата. Причината не е технички проблем, туку тоа што Месечината во тој дел од патеката ги попречува сигналите меѓу капсулата и контролата на летот.

Оваа фаза е однапред предвидена и е дел од планираниот лунарен прелет, кој се смета за една од клучните точки на целата мисија. Токму додека „Орион“ се движи по далечната страна на Месечината, екипажот ќе се најде во редок момент на целосна изолација од Земјата, пред повторно да воспостави врска и да го продолжи патот назад. „Артемис II“ е првата мисија со екипаж кон Месечината по повеќе од половина век.

Мисијата беше лансирана на 1 април и треба да заврши на 10 април со слетување во Тихиот Океан. Овој лет нема слетување на Месечината, но е клучна проба за следните фази од американската лунарна програма и за идните човечки мисии подалеку од Земјата.