Skip to content
Унгарија влегува во последните денови пред парламентарните избори на 12 април, во атмосфера каква што земјата не памети во изминатите 16 години. Опозициската Тиса на Петер Маѓар според повеќе независни анкети влегува како фаворит, а гласањето веќе се претвора во тест не само за власта на Виктор Орбан, туку и за идниот однос на Будимпешта со Европската унија.
Најсилниот сигнал доаѓа од последната независна проекција на Медијан, според која Тиса има предност од 20 до 21 процентен поен меѓу сигурните гласачи и дури би можела да стигне до двотретинско мнозинство во парламентот. Дополнителна анкета на Идеа, објавена од Ројтерс, исто така ѝ дава предност на Тиса, со 50 проценти поддршка меѓу определените гласачи, наспроти 37 проценти за Фидес. Истовремено, околу една петтина од гласачите и натаму се неопределени, што ја остава кампањата отворена до самиот крај.
Но анкетите не се и конечен исход. И самиот Маѓар предупреди дека избори не се добиваат во истражувања, особено кога во десетици изборни единици разликата може да се мери во стотици гласови. Ројтерс и други анализи потсетуваат дека изборниот систем и изборната карта во Унгарија со години му одат во прилог на Фидес, а мааната за опозицијата е што високата анкета на национално ниво не мора автоматски да значи и лесна претворање на таа предност во пратенички места.
Неизвесноста ја зголемува и начинот на броење. Според унгарската Национална изборна канцеларија, првите прелиминарни резултати треба да почнат да пристигнуваат вечерта по затворањето на гласачките места, но ако трката биде тесна, конечната слика може да се чека речиси до 18 април, кога ќе бидат преброени и гласовите пристигнати од амбасадите и од гласачите во странство. Тоа значи дека и покрај првичните бројки во недела навечер, политичката неизвесност може да потрае уште неколку дена.
Финишот на кампањата беше дополнително обременет и со силен геополитички набој. Во последните денови во фокусот влегоа објавени материјали за врските на унгарското раководство со Москва, како и посетата на американскиот потпретседател Џеј Ди Венс на Будимпешта, што опозицијата и дел од европската јавност ја читаа како отворена поддршка за Орбан. Така, неделното гласање повеќе не се доживува само како домашен партиски судир, туку како избор што може да ја смени и европската позиција на Унгарија.