Skip to content
Поранешниот полски заменик-министер за правда Романовски, кој е обвинет во Полска за проневера на јавни средства, можеби ја напуштил Унгарија преку Србија, изјави унгарскиот премиер Петер Маѓар за полскиот приватен канал TVN24 за време на неговата посета на Полска.
Прашањето како поранешниот полски министер за правда Збигњев Зиобро и неговиот заменик Марцин Романовски, кои ги бара полското обвинителство, успеале да ја напуштат Унгарија пред тој да ја преземе функцијата премиер, е тема на неговите разговори со полските функционери, пренесува Ројтерс.
Зиобро и Романовски се обвинети за проневера на јавни средства наменети за поддршка на жртвите на криминалот и за следење на политичките противници со користење на шпионски софтвер. Тие добија азил во Унгарија од поранешниот премиер Виктор Орбан.
Зиобро моментално е во Соединетите Држави, а според луѓе запознаени со ова прашање, заменик-државниот секретар Кристофер Ландау им наредил на високи претставници на Стејт департментот да му обезбедат виза. Местото каде се наоѓа Романовски останува нејасно.
„Колку што разбирам, Зиобро ја напушти Шенген зоната приближно еден ден пред мојата инаугурација“, рече Маѓар, додавајќи дека има индикации дека Романовски „отишол преку Србија“, но таа информација не е потврдена.
Маѓар призна дека очекувал двајцата да ја напуштат Унгарија по поразот на Орбан на изборите.
„За време на кампањата, неколку пати изразив сомнежи дека ќе ја напуштат Унгарија по изборите. Подоцна, се покажа дека сум бил во право. Додека Тиса е на власт, на меѓународните криминалци нема да им биде дозволено да престојуваат во Унгарија“, додаде Маѓар.
На својата прва прес-конференција по изборната победа на 12 април оваа година, Петар Маѓар изјави дека поранешниот македонски премиер „Никола Груевски е меѓународен криминалец и нема место во Унгарија. Унгарија нема да стане депонија за меѓународно барани криминалци. Ова важи и за Никола Груевски“, додаде тој.
Суд во Варшава издаде европска потерница за Романовски кон средината на февруари, додека истото барање од обвинителството против Зиобро сè уште е во фаза на разгледување од страна на судот.
Српското Министерство за надворешни работи сè уште не одговорило на барањето на Ројтерс за коментар за информациите дадени од Маѓар.
Маѓар се сретна во Варшава со полскиот премиер Доналд Туск и претседателот Карол Навроцки, пред да отпатува за Гдањск, на средба со поранешниот полски претседател и добитник на Нобелова награда за мир, Лех Валенса.
Варшава планира да ѝ понуди на Будимпешта пристап до американски течен природен гас преку нов терминал во Гдањск, кој треба да започне со работа во 2028 година, изјави извор запознаен со ситуацијата. Орлен (PKN.WA) веќе продава американски течен природен гас на Украина.
Од Полска – неговата прва посета на странска земја откако ја презеде функцијата – Маѓар ќе отпатува за Виена, од каде што ќе се врати во Будимпешта со воз.
