Патник од превртениот автобус кај Загреб тврди дека возачот заспал

Никола Голубовиќ, патник од превртениот автобус кај Загреб, тврди дека возачот заспал само неколку минути откако го заменил својот колега зад воланот. Во несреќата што се случи утринава, 8 ноември, на автопатот А3 кај Иваниќ Град, загинаа две лица, а 33 се повредени.

„Двајцата возачи се заменија на одмориште и возачот заспа неколку минути потоа“, изјави Голубовиќ за ХРТ. Тој кажа дека автобусот патувал од Србија кон Загреб.

Неговото тврдење засега не е службено потврдено. Полицијата ги утврдува околностите и причината поради која автобусот излетал од коловозот и се превртел.

Друг патник, Марин Јевиќ, раскажа дека околу 7:30 часот почувствувале како автобусот преминува кон работ на патот, по што удрил во заштитната ограда. Според неговото сведоштво, возилото се лизгало и се превртувало по тревната површина неколку десетици метри.

Јевиќ седел во задниот дел од автобусот. По запирањето слушнал лелеци и извици, а во негова близина двајца патници биле приклештени со седиште.

Несреќата се случила околу 7:25 часот, на 61. километар од автопатот А3 во насока кон Загреб, непосредно по клучката Иваниќ Град. Автобусот на српскиот превозник „Ниш експрес“ ја пробил заштитната ограда и завршил превртен покрај патот. Во него имало 33 патници и двајца возачи.

Според хрватското Министерство за здравство, шест лица се тешко, а 27 полесно повредени. Министерката Ирена Хрстиќ потврди дека меѓу повредените се и двајцата возачи.

На терен биле испратени девет екипи на итната медицинска помош, вклучувајќи хеликоптер. Повредените се згрижени во пет загрепски здравствени установи, а според Хрстиќ, тешко повредените биле пренесени во болница во рок од еден час. Во згрижувањето е вклучена и служба за психолошка помош, додека семејства на дел од повредените тргнале од Србија кон Загреб.