Skip to content
Дваесет и седумгодишна жена од селото Жидилово, кривопаланечко, била приведена откако, според МВР, спречувала вработени во Агенцијата за храна и ветеринарство да извршат службени дејствија за одземање домашни животни – крави.
Од МВР информираат дека полициски службеници од ОВР Крива Паланка ја лишиле од слобода Ј.Ѓ. на 25 февруари во 9:35 часот. Службените лица од АХВ постапувале по решение за спроведување мерки за одземање на добитокот.
Жената била приведена во полициска станица, а по целосно документирање на случајот против неа треба да следува соодветна пријава.
Случајот е дел од подолготрајниот проблем со неконтролираното движење на крави во кривопаланечкиот регион. Жители од повеќе села подолг период реагираат дека добитокот им нанесува штети на земјоделски површини, насади, пластеници и приватен имот, а локалните власти предупредуваат и на ризици за јавната безбедност.
Истиот ден, според полицискиот билтен, во ОВР Крива Паланка било пријавено и дека на магистралниот пат Крива Паланка – Куманово, во селото Жидилово, товарно возило управувано од државјанин на Бугарија удрило во крава, по што животното починало, а возачот го напуштил местото. По преземени мерки, возачот бил пронајден и против него ќе следува соодветна пријава.
Проблемот со кравите во Кривопаланечко веќе неколку пати завршуваше со полициски интервенции, реакции од жители и постапување на АХВ. Според претходни информации, државата почна со одземање на дел од животните откако со години се пријавувале штети и опасност од неконтролирано движење на добитокот.
Владата во март донесе одлука АХВ, како сопственик на заловените крави, да може да ги продава преку јавен оглас. Призма објави дека до тој момент биле заловени 84 крави, а првичните проценки зборувале за околу 600 животни кои се движеле без соодветна грижа низ регионот.
