Трамп: Јас донесувам одлуки, Нетанјаху мора да ги прифати

Израелскиот премиер Бенјамин Нетанјаху нема да има друг избор освен да прифати каков било договор што САД ќе го преговараат со Иран, изјави американскиот претседател Доналд Трамп во интервју за „Фајненшл тајмс“ објавено во неделата, истакнувајќи дека тој „донесува одлуки“.

„Тие нема да имаат друг избор“, рече Трамп, како што објави Ројтерс.

Израел нападна предградие на Бејрут во неделата, за прв пат откако САД објавија мировен план за Либан минатата недела. Иран подоцна испали ракети кон израелски цели, загрозувајќи ги разговорите за завршување на пошироката војна.

Иран претходно изјави дека секој мировен договор со САД ќе зависи од прекинот на огнот што е во сила во Либан, кој Израел го нападна во март во потрага по проиранските борци на Хезболах.

Иранската револуционерна гарда објави дека нивните напади врз Израел во неделата навечер се „предупредување“ за поширок одговор што ќе ги вклучи сите американски и израелски цели во регионот доколку се повторат „агресиите“.